Татарстанның тагын 755 авылына интернет кертәчәкләр

Халкы 500 кешегә кадәр булган авылларда 2021 ел ахырына универсаль элемтә системасы булдырылачак, дип хәбәр итте Россия Президенты Владимир Путин матбугат конференциясендә. 

«Халкы 250дән 500гә кадәр булган авылларда 2021 ел ахырына кадәр универсаль элемтә системасы — телефон һәм интернет — булдырылырга тиеш», — диде Путин. 

Татарстан Республикасында 4G челтәре үсеше — ил буенча иң югарысы. Мисалга, югары тизлекле интернет белән татарстанлыларның 93 проценты куллана ала, диләр ТР Минцифрасында.

Бүгенге көндә республика территориясендә 4G челтәрен тотучы 10 823 база станциясе эшли. 

Татарстанның элемтә министрлыгында хәбәр итүләренчә, Татарстанның 4G үсешендә булган алдынгылыгы кешеләрнең үзләренең сыйфатлы элемтәгә мохтаҗ булулары белән аңлатыла. Мәсәлән, мобиль интернет-трафик үсеше саклана. 

«Узган ел белән чагыштырганда ул 43 процентка артты һәм 140 мең терабайтка җитте диярлек, ягъни бер абонентка исәпләгәндә аена 12 гигабайт трафик булып чыга», — диләр министрлыкта.

Моннан тыш, интернет Татарстанның 755 авылында үткәреләчәк.