Татарстанның әтиләр берлеге сукбай этләрне контрольдә тотуны көчәйтүне таләп итте

Балаларга һөҗүм итү очраклары кабатланмасын өчен йортсыз хайваннарны контрольдә тоту чараларын көчәйтергә кирәк. Татарстанның әтиләр берлеге рәисе Гадел Заһретдинов әнә шундый белдерү белән чыгыш ясады, дип яза «Вести Татарстан».

«Васильеводагы бу фаҗига безне кичекмәстән һәм системалы үзгәрешләр таләп итәргә мәҗбүр итә. Әтиләр берлеге исеменнән мин хис-кичерешләрдән гамәлләргә күчәргә һәм ни өчен гамәлдәге чаралар безнең баланы яклый алмавын гадел анализларга чакырам», — дип язган ул үзенең Telegram-каналында.

Заһретдинов билгеләп үткәнчә, ата-аналар балаларын һәрвакытта да яклый алмый, чөнки урамдагы этләр, хуҗалары яннарында булса да, еш кына эләктерелмәгән була.

Ул шулай ук ассызыклаганча, Татарстанда, башка күп кенә регионнардагы кебек үк, ОСВВ системасы эшли (отлов, стерилизация, вакцинация, возвращение), ул рәсми рәвештә нәтиҗәле дип танылган.

Аның сүзләренә караганда, борчулы статистика үзе өчен үзе сөйли: быелның 11 аенда республикада хуҗасыз эт тешләүнең 3 меңгә якын очрагы теркәлгән. Ветеринария белгечләре дә таный торган системаның төп зәгыйфьлеге — хайваннарның, шул исәптән стерильләштерелгәннәрнең, бигрәк тә көтүдә булганда, үз-үзләрен тотышының алдан белеп булмавы.

Әтиләр союзы башлыгы кичекмәстән эш итәргә кирәклеген ассызыклады. Ул регионнарга хайваннарны приютларда тоту тәртибен һәм аларның тору вакытын мөстәкыйль җайга салу хокукын биреп, кануннарга төзәтмәләр кертергә, әлеге нормаларны үтәүне контрольдә тотуны көчәйтергә, этләрен урамга чыгарып җибәргән һәм хайваннардан баш тарткан өчен хуҗаларның җаваплылыгын катгыйландырырга, шулай ук приютлар челтәрен һәм хайваннарны җаваплы тоту программаларын үстерергә тәкъдим итте.

«Безнең балаларыбызның урамнарда куркынычсызлыгы — ул гуманлык һәм кырыслык арасында сайлау мәсьәләсе түгел. Бу өлкәннәрнең нәтиҗәлелеге һәм җаваплылыгы мәсьәләсе. Без баланың тормышка һәм куркынычсызлыкка хокуклары абсолют һәм бәхәссез өстенлек бирә торган система булдырырга бурычлы», — дип нәтиҗә ясады ул.