Тренер Рафаил Хәмидуллин Алабуганың теннис кортлары турында сөйләде

Сүз уңаеннан, әлеге титуллы профессиональ тренер Татарстан башкаласында теннис Федерациясен ачу башлангычында торган, Казанда теннис буенча беренче спорт мәктәбен ачкан һәм теннисның барлык нечкәлекләрен белгән шәхес. Әлбәттә, шәһәр хакимиятенең бу уен төрен генә түгел, гомумән спортны үстерүгә мөнәсәбәте тәҗрибәле белгечнең игътибарыннан читтә калмады.

‒ Минем беренче тәэсирләрем бик яхшы. Алабугадагы спорт корылмалары мине гаҗәпләндерде. Боз сарае да, ясалма өслекле матур стадион да, футбол стадионы да. Бассейннар, нәфис гимнастика, бокс, волейбол белән шөгыльләнү өчен заллар. Һәм, ниһаять, теннисны үстерү өчен бик күп эш башкарыла, — дип билгеләп үтте тренер.

Рафаил Хәмидуллин зур булмаган провинциаль шәһәрдә теннис кортлары булуына шаккатуын белдерде. Алар башкаладагыдан ким түгел, дип өстәде Казаннан тренер.

‒ Шәһәрнең дүрт теннис корты бик яхшы сыйфатлы. Заманча эшләнгән. Мондый кортларда теләсә нинди дәрәҗәдәге ярышлар да үткәрергә мөмкин. 90нчы елларда без Казанда Теннис Федерациясен төзи генә башлаганда, мондый кортлар турында хыяллана да алмадык. Бездә бары тик берничә асфальт корт кына бар иде. Бу Рөстәм Нуриев һәм Эльмира Әхмәдиеваның, район җитәкчелегенең зур казанышы, дип уйлыйм мин. Өстәвенә, шәһәрдә спортны үстерү секторы ягыннан да зур эш эшләнелә, с — дип уртаклашты Рафаил Хәмидуллин.

Хәзерге вакытта Алабугада булган дүрт теннис кортында (3 корт «Бердәм Россия» спорткомплексында һәм бер корт — 6 микрорайонда) ремонт эшләре төгәлләнгән, «хард» өслек белән түшәлгән. Бу заманча, югары дәрәҗәдәге өслек. Дөньякүләм дәрәҗәдәге барлык теннис ярышлары да нәкъ менә шундыйларда уза.

«Хард» өслеген Мәскәү белгечләре урнаштырган. Каплау бәясе — 4 миллион сумны тәшкил иткән. Республикада мондый кортлар белән, Казаннан тыш, хәзер Алабуга да мактана ала.

Заманча һәм төзекләндерелгән кортларда инде 4 яшьтәге балалар белән «Десять S» программасы (Халыкара теннис федерациясе программасы) буенча күнегүләр планлаштырылган.

Программа нигезендә шөгыльләнүчеләрнең яшенә карап шартлар булдыру методикасы ята. Ә бу — кечерәйтелгән зурлыктагы кортлар да, акрын гына сикерә торган туплар да, тиешле җиңел ракеткалар да. Боларның барысын да сатып алырга кирәк әле.

«Теннис 10» программасы өч баскычлы. Ул әзерлекнең төрле дәрәҗәсенә һәм яшенә туры килә. Алар шартлы рәвештә кызыл (4-5 яшь), кызгылт сары (6-8 яшь) һәм яшел (9 яшьтән) дәрәҗәләр буларак билгеләнәләр.

Дәрәҗәләр зурлыклары буенча рәтләнә. Кызыл кортның озынлыгы 11-12 метр, ә киңлеге 5-6 метр. Кызгылт сары кортның озынлыгы 18 метр, киңлеге 6,5 метрдан 8,23 метрга кадәр. Балалар үскән саен кортның размеры да зуррак булырга тиеш.

Белгечләр мәсьәләсе әлегә ачык. Хәзерге вакытта Алабугада чакырылган ике тренер эшли. Рафаил Хәмидуллиннан тыш, Алабуга егетләрен Уфадан Арсений Машкин һәм Казаннан Никита Клементьев өйрәтә.

‒ Әлегә яшь теннисчыларның әзерлек дәрәҗәсе йомшаграк. Ләкин берничә егетнең уенын, алар якынча 7-8 кеше, барыбер аерып күрсәтергә мөмкин. Сүз уңаеннан, аларны хәтта җәй көне Алабугага килгән «2003 елның беренче дөнья ракеткасы» Надежда Петрова да билгеләп үтте. Халыкара класслы спорт мастеры Надежда Петрова бирегә тагын бер тапкыр килергә планлаштыра. Аны октябрь ахырында көтәбез, — дип хәбәр итте тренер.

Алабугада зур теннисның киләчәге нигезле булды. Хәзер шәһәрдә тагын ике корт төзү өчен документлар әзерләнә. Алар «Чемпион» ФОК артында 6 микрорайонда төзеләчәк. Төзелешне 2025 елның маенда башлау планлаштырыла. Төзелеш өчен республика казнасыннан 14 миллион сум бүлеп биреләчәк.