Үткәнгә сәяхәт: Алабугада беренче этно-фестиваль ничек узды

Бәйрәмнәргә һәм фестивальләргә бай Алабугада масштаблы мәдәни вакыйга — «Алабугай: слияние легенд» беренче этник фестивале узды. Әлеге вакыйганы уздыру идеясенең авторлары — Нияз Кашбиев һәм Дмитрий Мокшин. Чара алабугалылар инде яратып өлгергән яңа шәһәр киңлегендә — «Пристань» пляжында узды.

Бу яңа фестиваль уникаль рәвештә борынгы риваятьләр мистикасын, табигать матурлыгын, хәзерге заман энергиясен һәм җиребезнең кабатланмас рухын берләштерде.

Тантаналы ачылыш һәм рәхмәт сүзләре

Бәйрәмнең мәртәбәле кунаклары арасында Алабуга дәүләт музей-ядкарьлеге генераль директоры Гөлзада Руденко һәм «Соллерс Алабуга» җәмгыяте генераль директоры Алексей Матасов бар иде.

Гөлзада Руденко Алабуга муниципаль районы башлыгы Рөстәм Нуриевка матур иҗтимагый киңлек булдырган өчен, шулай ук фестивальне оештыручыларга рәхмәт белдерде: «Бу яшь алабугалылар, алар шәһәребез өчен яңа бәйрәм ясадылар. Әлеге фестивальнең традициягә әйләнүен һәм кунакларны күбрәк җәлеп итүен бик телим. Бу алабугалыларның тормышын бизәячәк бишенче фестиваль».

Алексей Матасов барысын да шәһәр көне һәм Республика көне белән котлады: «Соллерс» Татарстан һәм Алабуга тормышына инде 20 елдан артык интеграцияләнгән, һәм без һәрвакыт шундый тантаналы вакыйгаларда катнашабыз. Һәрберегезне чын күңелдән котлыйм«.

Район башлыгы Рөстәм Нуриев шулай ук алабугалыларны котлады, оештыручыларга рәхмәт белдерде.

Бүләкләү тантанасы

Бүләкләү тантанасы программаның мөһим өлеше булды. Күпьеллык хезмәте һәм «Мәдәният» илкүләм проектын уңышлы гамәлгә ашыруы өчен «ТР атказанган мәдәният хезмәткәре» дигән мактаулы исем А. С. Пушкин исемендәге Үзәк китапханәнең әйдәп баручы методистына Ирина Богомоловага бирелде.

Татарстан Республикасы Мәдәният министрлыгының «Мәдәнияттәге казанышлары өчен» күкрәк билгесе белән Поспелово мәдәният йорты директоры Григорий Галкин бүләкләнде. ТР Рәисе исеменнән Рәхмәт хатлары «Безнең ишегалды» программасында катнашкан җәмәгать активистларына һәм тәртип урнаштыруда ярдәм иткән халык дружинасы әгъзаларына тапшырылды.

Барысы өчен дә бәйрәм: цигуннан алып тимерчелек эшенә кадәр

Бәйрәм программасы гаять бай булды. Иртәнге 10нан пляж территориясендә сәүдә рәтләре, интерактив мәйданчыклар һәм мастер-класслар эшли башлады. Евгений Репин алып барган цигун буенча сессияләр аеруча популяр булды.

Фестиваль кунаклары традицион кәсепләр буенча мастер-классларда үзләре кызыклы әйберләр ясый яки балчыктан оригиналь савыт-саба ясый ала иде. Яр Чаллыдан «Ключ» театрының театральләштерелгән тамашалары һәм пляж территориясендә урнашкан Алабуга җире легендалары төшерелгән плакатлар кабатланмас атмосфера тудырды.

«Бәйрәм югары дәрәҗәдә оештырылган, барлык мастер-класслар да бик кызыклы, барысына да барасы килә. Концерт номерлары атмосфера тудыра», — дип тәэсирләре белән уртаклашты алабугалы Гөлфия Сәхәбиева. Бу көнне Алабугага Чаллы, Түбән Кама һәм Әлмәт шәһәрләреннән кунаклар җыелган иде.

Буыннарны берләштерүче музыка

Көне буе сәхнәдән этник мотивлар яңгырады. Тамашачылар алдында җирле коллективлар да, чакырылган йолдызлар да чыгыш ясады: Яр Чаллыдан «Мята» фольклор проекты, Казаннан Gauga татар рок-төркеме һәм Мәскәүдән популяр җырчы Gayana. Аларның дәртле ритмнары бар кешене дә биетте.

Бәйрәм DJ Динар Биляловтан дискотека һәм мавыктыргыч фаер-шоу белән тәмамланды.

Оештыручылар үз сүзендә тордылар: «Алабугай» фестивале кунакларны Алабуга җире тарихына һәм рухына чумдырды, һәркемгә тамырларына кагылырга, табигать энергиясе белән тулыланырга һәм киләчәк көче белән илһамланырга мөмкинлек бирде.