Видеоплатформалардагы балалар контентын татарчага тәрҗемә итәргә тәкъдим иттеләр

Россиянең иҗтимагый инициативалары сайтында видеоплатформаларда балалар өчен контентны автомат рәвештә татар теленә тәрҗемә итү турындагы инициатива чыккан. Бу хакта инициатива авторы Лилия Косолапова сөйләде. 

Автор фикеренчә, балаларның туган телдә булмаган бик күп видеолар каравы татар телен белмәүгә китерә. Шуңа балада рус теле беренче тел буларак формалаша.

Автор хәзерге вакытта бу проблеманы хәл итү өчен платформаларда барлык мөмкинлекләр булуын ассызыклый. Аның тәкъдиме буенча, әгәр кулланучы Татарстан Республикасыннан икән һәм ул балалар контенты белән кызыксына икән, платформа автомат рәвештә видеоны татар теленә тәрҗемә итәргә тиеш. Бу очракта балар татар телендәге контентны күп ишетә һәм үзара да татарча аралаша башлый.

Автор фикеренчә, бу эшне җайга салу өчен карар чыгарырга кирәк. Инициативаның тулы тексты белән танышу өчен сылтама.