Хәбибуллиннарның әкияти йорты

Хәбибуллиннар үзләре салган йортта дүрт ел яшиләр. Фундаменттан алып түбәгә кадәр — барысы да автор уйлануы, мәхәббәт һәм кайгырту белән эшләнгән.

Үз йортлары — аларның кадерле хыялы, алар аны бик тырышып тормышка ашырганнар. Ә Яңа ел алдыннан яшь әти-әни торакны әкияти Теремкәйгә әвеледерергә булганнар. Ишек алдында агач боланнар тезелеп торалар, алар янында — нарат ботакларыннан кызыл бүрек кигән сакаллы алты гном. Ә түбәдә, фасадта, тәрәзәләрдә һәм сыннарда төрле төстәге лампочкалар куелган йөз метрдан артык гирлянда сузылган, алар тылсымлы атмосфера тудыралар.

31 декабрь көнне шәһәрнең төп чыршысында Хәбибуллиннар гаиләсе шәхси йортның Яңа елга иң яхшы бизәлеше өчен муниципаль конкурста җиңүче дип танылды. Бүләк алу, әлбәттә, күңелле, ләкин бу төп максат түгел иде, дип таныды йорт хуҗабикәсе Ирина.

— Мин Алабуга телевидениесендә журналист булып эшләгәндә, миңа еш кына бакчачылык, фермерлык, экотуризм белән шөгыльләнүче кешеләр белән очрашырга туры килде. Ә Яңа елга үз йортын, участогын һәм хәтта урамын бизәгән гаилә үзенең оптимизмы һәм дәрте белән гомерлеккә исемдә калды. Мин һәрвакыт мондый кешеләргә соклана идем һәм миңа иҗат өчен үз йортым булу мөһим иде, — ди Ирина.

Хәзер Хәбибуллиннар гаиләсе шәһәр читендә яши. Ирина кайчандыр хыялланган шөгыленә рәхәтләнеп вакытын багышлый. Кышкы иллюминация, барыннан да элек, кечкенә кызым өчен әкият булдыру өчен планлаштырылган иде, дип белдерде Ирина. Интерьерны һәм ишегалдын ул сабый белән бергә бизәгән, ә гирляндага барып җиткәч, ире һәм әти-әниләре эшкә кушылган. Мондый могҗизалы йортка Кыш бабайны чакырырга була — барысы да әзер!

— Кыш бабай бөтен гаиләнең күңелен ачты һәм гномнарның берсе тирәсендә әйлән-бәйлән уйнатты. Яңа ел тылсымчысының килүенә бигрәк тә мин сокландым. Могҗизаларга ышанам мин! Без бабайны «Лукоморье» шигыре белән гаҗәпләндерергә ниятләгән идек тә, кызым барысын да онытып җибәрде. Шулай да былтыргы дүрт юллык шигырьне исенә төшерде. Иремә җыр җырларга һәм биергә туры килде. Бу вакытта күршеләребез безгә килгән Кыш бабайны күзәтеп торалар иде. Кыскасы, барысының да кәефен күтәрделәр! — дип уртаклашты Ирина.

Кар эреп беткәч бакча-яшелчә сезоны башланачак... Ирина белгечлеге буенча биолог, ә хыялланган һөнәре буенча — ландшафт дизайнеры. Димәк, Купеческая урамындагы йортны әле язгы, җәйге һәм көзге әкиятләр көтә.