Кабат исерек килеш руль артына утырган татарстанлының Mercedes машинасы конфискацияләнгән

Түбән Камада суд ТР Мамадыш районы Соколка авылында яшәүче 35 яшьлек кешенең Mercedes-Benz автомобилен тартып алган. Ачыкланганча, ир-атны исерек хәлдә автомобиль белән идарә иткән өчен тоткарлаганнар.

Татарстан прокуратурасы хәбәр иткәнчә, машина йөртүченең моңа кадәр дә исерек хәлдә руль артына утырганы өчен административ җаваплылыкка тартылганы булган инде.

Ир-ат үз гаебен таныган. Чит ил машинасын конфискацияләүдән тыш, татарстанлыга 200 сәгать мәҗбүри эш билгеләнгән һәм ике елга хокукларыннан мәхрүм ителгән.