Алабугада совет гаскәрләрен Әфганстаннан чыгаруга 34 ел тулуга багышланган митинг үтте

Бүген сугышчы-интернационалистларны искә алу мемориалында Әфганстаннан совет гаскәрләрен чыгару көненә багышланган тантаналы митинг булды.

Чараны Әфганстанда хәрби хәрәкәтләрдә катнашкан Пулат Насриев «Черный тюльпан» җыры белән ачып җибәрде.

Митинг мәйданына ветераннар, оешма һәм предприятие җитәкчеләре, укучылар, студентлар, «Яшь гвардия» вәкилләре җыелган иде. АМР башлыгы урынбасары Олег Колпаков чараны ачып җибәрде:

— Хөрмәтле әфганчылар, хөрмәтле ата-аналар. Моннан 34 ел элек Әфганстаннан соңгы солдат чыгарылды. Сезнең батырлыгыгыз тарихта мәңгегә калачак. Хәзер сез махсус хәрби операциядә үз бурычларын үтәгән, чикләребезне яклаган, безне һәм безнең гаиләләрне яклаган егетләргә үрнәк булып торасыз, диде ул.

Алабуга районыннан Әфганстанда барган хәрби хәрәкәтләрдә 193 сугышчы катнашты, аларның өчесе һәлак булды. 

Һәлак булган сугышчыларны бер минут тынлык белән искә алдылар. Чара чәчәкләр салу белән тәмамланды.