Алабугалылар мобилизацияләнгән туганнары белән күрешергә бардылар

Мобилизацияләнгәннәрнең туганнары һәм якыннары якшәмбедә иртүк шәһәр Мәдәният сарае алдына җыелды. Явып торган яңгырга берәү дә игътибар итмәде — хатыннар, аналар, апа-сеңелләр, кызлар ирләре, әтиләре, абый-энеләре янына китәргә автобус көтте. Аларның йөзендәге кичерешләр бер-бер артлы алышына торды — югалып калу, борчылу, хәвефләнү. Шулай да күзләрдә туганнарының исән-имин әйләнеп кайтырына өмет бар. Бу иртәдә аларның күбесенең аралашырга да теләге юк иде, ләкин хатын-кызларның һәрберсе үзен нык һәм батырларча тотты, аларның туганнарына бит хәзер нык терәк кирәк.

Ләлә Седунова әйтүенчә, алар гаиләсеннән берьюлы ике кешене алганнар — улын һәм тормыш иптәшенең абыйсын.

— Улыма — 38, туганыбызга — 55 яшь. Алар белән күрешеп кайттым инде. Икесенең дә кәефе ярыйсы кебек, без дә кайгырмыйбыз — әлегә берни дә күрмәдек бит, алда нәрсә көткәнен кем белә. Бирешмибез. Аларга кирәкле әйберләр, ашамлыклар алып барам. Автобус бирүләре яхшы, уңайлы. Мобилизацияләнүчеләр барысы да исән-сау һәм тиздән әйләнеп кайтыр дип өметләнәбез, — ди Ләлә Даян кызы. 

Мария Штенникова да кызы белән бергә ире янына җыенган.
— Телефоннан сөйләшкән идек. Күңеле күтәренкегә охшаган. Болай бернәрсә дә сорамады. Яхшы ашаталар, ди. Тамаклары тук, өсләре бөтен, дигәндәй. Барыбер алып барабыз инде, чикләвекне бик ярата, — ди ул.

Марина Симонова шулай ук ире белән күрешергә бара. Ул мобилизация хәбәрен ничек алулары турында сөйләде.
— Беренче тапкыр барам, 7 яшьлек улым белән. Иремне 25 октябрьдә чакырдылар. Хәзер бераз тынычландым инде, башта бик кыен булды, бу хәбәрне һәр кеше авыр кабул иткәндер дип уйлыйм. Куркыныч бит — кеше ял итәргә түгел, көрәшкә бара. Әлбәттә инде, без барысы да исән-имин кайтыр дип ышанабыз. Тормыш иптәшем — минем терәгем, ул яхшы күңелле, ярдәмчел кеше, һәрчак улым белән миңа бар нәрсәдә булышты. Бүген ирем танк училищесында өйрәнү уза, һәм мин тыныч, чөнки ул исән-сау. Безгә автобуслар бирүләренә дә шатмын, ничек барып кайтырга дип борчыла идем, — диде Марина Симонова.

Көндез Казан танк училищесында мобилизацияләнүчеләрне җибәрү уңаеннан митинг-концерт булды. Аларның бер өлеше махсус хәрби операция урынына якын өлкәләргә өстәмә хәзерлеккә китә. Туганнары аларны җиңеп һәм исән-сау кайтуларын теләп, җылы хушлашып озатты.