Ел башыннан битлек режимын бозган өчен 300 алабугалыга беркетмә төзелгән

«Бу ел башыннан 300 административ беркетмә төзелгән. Санитар кагыйдәләрне беренче мәртәбә бозган очракта, ешрак кисәтү генә ясала. Кеше битлек режимын кабаттан боза икән, аңа штраф салына», — дип хәбәр итә Алабуга районы башлыгының матбугат хезмәте. 

РФ административ хокук бозулар кодексының 6,3 статьясының 2нче маддәсе буенча халыкның санитар-эпидимиологик иминлеген тәэмин итү өлкәсендә хокук бозулар өчен түбәндәге күләмдә административ штраф каралган:

— гражданнарга — 15 мең сумнан 40 мең сумга кадәр
— вазифаи затларга — 50 мең сумнан 150 мең сумга кадәр.

Роспотребнадзор үзегезнең һәм якын-тирәдәгеләрнең куркынычсызлыгын тәэмин итү йөзеннән, җәмәгать урыннарында һәм кеше күп җыелган җирләрдә битлек кияргә киңәш итә.