Игътибар, үзгәрешләр: «Сәүдәгәрләр шәһәре»ндә парковка һәм хәрәкәтнең яңа кагыйдәләре

Машина кую тыела

Спас, Говоров, Олы Покров, Гассар һәм Казан урамнарында «тукталыш тыела» билгеләре куелды. Машина йөртүчеләрнең исләренә төшерәләр: эвакуатор билгесе булган зонада калдырылган автомобиль тоткарланачак һәм махсус стоянкага күчереләчәк.

Шәһәр халкына һәм кунакларына уңайлы булсын өчен машина кую урыннары эшләвен дәвам итә. Транспортны калдырырга мөмкин булган урыннар:
Шишкин урамында (стадион янында);

Говоров урамы һәм Нефтьчеләр проспекты киселешендәге автостоянкада.

Беренче рейд — беренче штрафлар

Чәршәмбе көнне Дәүләт автоинспекциясе хезмәткәрләре беренче рейд уздырды, аның нәтиҗәләре буенча 15 машина йөртүче административ җаваплылыкка тартылды. Хуҗалары тыюны игътибарсыз калдырган тугыз автомобиль махсус тукталышка җибәрелде.

Россия Эчке эшләр министрлыгының Алабуга районы буенча ЮХИДИ идарәсе башлыгы Тимур Галимуллин бу хәлне шәрехләде һәм хокук бозуның финанс нәтиҗәләре турында искәртте:

«Тиешсез урында туктаган өчен гамәлдәге административ хокук бозулар кодексында 2250 сум күләмендә штраф каралган. Әмма бу суммага эвакуатор хезмәте өчен чыгымнар — 3500 сум, шулай ук махсус тукталышта саклау өчен түләүләр өстәләчәк: мотоцикллар өчен — тәүлегенә 35 сум, җиңел автомобильләр өчен — 70 сум, йөк машиналары өчен — 140 сум».

Якын киләчәктә машина йөртүчеләрне нәрсә көтә?

Шәһәр хуҗалыгы буенча киңәшмәдә хәрәкәт схемасын үзгәртү буенча киләчәк планнар турында игълан ителде. Якын көннәрдә Казан урамында, Муса Җәлил урамыннан Гассар урамына кадәрге участокта «керү тыела» («кирпеч») билгесе куелачак.

Моннан тыш, ике атна дәвамында парковканы тыя торган билгеләр шәһәрнең өске өлешендә — Нефтьчеләр проспектында да барлыкка киләчәк. Монда калдырылган автомобиль шулай ук эвакуацияләнәчәк. Исегезгә төшерәбез, бу зонада автомобильчеләр өчен машина кую урыны булдырылган, анда беренче сәгать дәвамында машина кую урыны бушлай. Машиналарны нәкъ менә шунда калдырырга кирәк.