Роспотребнадзор гомуми битлек режимы кертте

Короновирус инфекциясе таралуга чик кую максатыннан, Роспотребнадзор Россиядә гомуми битлек режимы кертә. Бу хакта карарга Анна Попова кул куйган. 
«Россия Федерациясе территориясендә булган кешеләргә халык күп җыелган урыннарда, җәмәгать транспортында, таксида, парковкаларда, лифтларда гигиеник битлек киеп йөрүне тәэмин итәргә», — диелә карарда. 
Моннан тыш, 23 сәгатьтән иртәге 6га кадәр күңел ачу чаралары үткәрү һәм җәмәгать туклану оешмаларының эше тыелган. Дезинфекцияләү режимын ныгыту киңәш ителә. 
Карар иртәгә, 28 октябрьдә үз көченә керә.