Татарстанда ел башыннан 15 кеше гөмбә белән агуланган

ТР буенча Роспотребнадзор идарәсе мәгълүматларына караганда, ел башыннан республикада гөмбә белән агулануның 13 очрагы булган. Агуланудан барлыгы 15 кеше зыян күргән, шуларның өчесе — балалар. Үлүчеләр юк. 

Роспотребнадзорда гөмбәләрнең ашказаны өчен авыр эшкәртелә торган ризык булуын искәртәләр. Гөмбә белән агулануның төп билгеләре: ашаганнан соң күңел болгану, косу, тәүлегенә 10-15 тапкыр эч китү, эч авырту, пульс зәгыйфьләнә, куллар һәм аяклар — салкын була. 

Агуланмас өчен берничә гади кагыйдәне үтәргә тырышыгыз: иң беренчесе — үзегез танымаган гөмбәләрне җыймагыз да, ашамагыз да. Картайган һәм кортлы гөмбәләрне, шулай ук машина юлы, тимер юл, заводлар, сәнәгать зоналары янында үскәннәрне җыймагыз. 

Бүлмә температурасында гөмбәләрне 3 сәгатьтән артык сакламагыз. Аларны пешерер алдыннан яхшылап юыгыз һәм чистартыгыз.

Һәм иң мөһиме: агулануның беренче билгеләре булу белән ашыгыч рәвештә медицина ярдәменә мөрәҗәгать итегез.

Фото: Татар-информ.