Алабугада Коръән укучылар бәйгесендә быел рекордлы санда бала катнашты

Алабугада ел саен үткәрелә торган Коръән укучылар бәйгесе үтте. Быелгы чара аеруча истә калырлык булды — катнашучылар саны 90 га якынлашты. Әлеге бәйге Алабуганың Җәмигъ мәчетендә ел саен уздырыла, һәм анда 15 яшькә кадәрге балалар катнаша, дип хәбәр итә Алабуга мөхтәсибәте. 

‒ Быелгы иң яшь катнашучыга нибары 2,8 яшь иде. Без, бәйге оештыручылары буларак, Изге Коръәнне укырга теләүчеләр саны елдан-ел артуын шатланып күзәтәбез. Быел — рекорд: 89 катнашучы! — дип билгеләп үтте Алабуга районының имам-мөхтәсибе Хәлим хәзрәт Шәмсетдинов.

Бәйгенең бәяләү кагыйдәләре үзгәрешсез калды: сүрәләрне яттан хатасыз уку, өйрәнелгән сүрәләр саны, Коръәнне оригиналда уку осталыгы исәпкә алынды. Моннан тыш, катнашучының тышкы кыяфәтенә дә игътибар бирелде.

Яңа үзгәрешләрдән — быел бәйгегә яңа номинация кертелде: Коръәннең бер җүзеннән күбрәк өлешне белү буенча. (1 җүз — Коръәннең 30 өлешенең берсе). Әлеге номинациядә 6 бала катнашты, җиңүче булып 14 яшьлек Хәбибә Вәлиева танылды.

Барлык катнашучыларга татлы бүләкләр тапшырылды, ә җиңүчеләргә дипломнар һәм акчалата бүләкләр бирелде.

Алабуганың мөхтәсибәте «Алабуга» хәйрия фондына чараны үткәрүдә булышлык күрсәткәне өчен зур рәхмәтен белдерә.

Оештыручылар фикеренчә, мондый чаралар балаларга яңа тәҗрибә бирү генә түгел, ә Изге Коръәнне һәм рухи кыйммәтләрнең әһәмиятен искә төшерү өчен дә кирәк.

Фотолар: Алабуга мөхтәсибәте матбугат хезмәте