Рамазан-2026: намаз укырга өйрәнергә һәм яхшылык эшләргә вакыт

Изге Рамазан ае башланырга бер атна диярлек вакыт калып килә, шуның белән бәйле без дини темага багышланган мәкаләләр бастыруыбызны дәвам итәбез.

«Минем беренче намазым» курслары турында

Инде менә бишенче ел рәттән Алабуганың Җәмигъ мәчете кыска вакыт эчендә намаз уку нигезләренә төшенергә теләгән кешеләр өчен «Минем беренче намазым» курсларын оештыра. Моның өчен Изге Рамазан ае сайлана һәм бу очраклы түгел.

— Әлеге дәресләрне үткәрү өчен Рамазан аен сайлыйбыз, чөнки Рамазан ае — ул бәрәкәтле ай, кылынган изге эшләрнең әҗере арта, ә намаз — ул иң зур изгелек, һәм бу вакытта дога өйрәнү, намазга килү кешегә җиңел бирелә. Рамазан аенда шул изгелекне кылырга чакырабыз, — дип аңлата Хәлим хәзрәт Шәмсетдинов.

Әлеге проектның максаты — 4 көн эчендә теләге булган һәркемне намаз укырга өйрәтү. Әлеге дәресләр кысаларында намаз уку өчен кирәк булган бар минималь мәгълүмат бирелә. Дәресләр барышында катнашучыларга намаз уку тәртибен генә түгел, ә дингә кагылышлы сораулар бирү мөмкинлеге дә тудырыла — бу исә укуларны тагын да җанлырак һәм файдалырак итәргә ярдәм итә.

Әлеге проектта 14 яшьтән өлкәнрәк, теләге булган һәр кеше катнаша ала: ир-атлар да, хатын-кызлар да. Дәресләр Рамазан аеның һәр шимбәсендә узачак.

Башка еллар статистикасы буенча, әлеге дәресләргә урта һәм өлкән яшьтәге кешеләр килә, балалар азрак, ди Хәлим хәзрәт Шәмсетдинов.
Былтыр әлеге курсларны 29 укучы тәмамлаган.

«Минем беренче намазым» курслары — Ислам нигезләрен өйрәнергә теләп тә, тулы мәдрәсәдә укый алмаган кешеләр өчен зур мөмкинлек. Шулай итеп, беренче дәрес 21 мартта Җәмигъ мәчетендә 10:00дән 12:00гә кадәр үтәчәк.

Белешмәләр өчен телефон: +7 939-368-33-95.

Рамазан ае — игелекле эшләр вакыты

Мөселманнар өчен Рамазан ае — шәфкатьлелек вакыты. Ярдәмнең иң кулай формаларының берсе — сәдака. Мәчетләрдә акчалата ярдәм өчен махсус тартмачыклар урнаштырылган, акчаны социаль челтәрләрдә куелган QR-кодлар буенча онлайн да җибәреп була. Җыелган акчалар мәчетне ремонтлауга, ифтарлар үткәрүгә һәм башка ихтыяҗларга тотыла. Ураза тотучылар өчен ифтарга теләсә нинди сумма белән ярдәм итәргә була — моның өчен аерым җыем оештырыла.

Ләкин һәр мөселман мәҗбүри түләргә тиеш сәдака да бар. Бу — фитр-садака. Быел аның күләме — бер кешегә 200 сумнан да ким булмаска тиеш. Әлеге сәдака фәкать мохтаҗларга бирелергә тиеш. Фитрны акча яки азык-төлек белән турыдан-туры таныш мохтаҗларга яки мәчет аша тапшырырга мөмкин. Бу түләүне Рамазан аеның соңгы көннәренә кадәр кичектереп торырга ярамый: мәчетләргә азык-төлек сатып алырга һәм аларны бәйрәмгә кадәр өләшеп өлгерергә вакыт кирәк.

«Кеше приюты» да игътибарсыз калмый. Монда шулай ук азык-төлек алып килергә, оешманың рәсми төркемнәрендә QR-кодлар аша акча күчерергә мөмкин.