Ураза-2026: Рамазан ае кайчан башлана һәм ничә көн дәвам итә

18 февраль — кояш баю белән мөселманнар өчен изге ай — Рамазан ае башлана. Ләкин аңа инде хәзердән үк әзерләнәләр. Шәгъбан ае җитү белән мәчетләрдә һәм кешеләрнең күңелләрендә Рамазан аена рухи һәм физик әзерлек чоры башлана.

Имам-хатыйб Хәлим хәзрәт Шәмсетдинов әйтүенчә, хәзер ураза тотуның чын мәгънәсен аңлау мөһим. Бу ашаудан һәм эчүдән баш тарту гына түгел, бәлки уйларның сафлыгы, яхшылык һәм мохтаҗларга ярдәм итү дә. Мәчетләр инде әлеге айга актив әзерләнә.

Рамазан аеның беренче киченнән, 18 февральдән, мәчетләрдә Рамазан аенда гына укыла торган намаз — Таравих уку башлана. Коллектив таравихта катнашырга барлык ир-атлар чакырыла. Ә инде 19 февральдә Җәмигъ мәчетендә ифтарлар — уразадан соң кичке аш мәҗлесе башлана.
Гариза биреп, тиешле сумманы түләп, мәчеттә ифтар үткәрү мөмкинлеге бар. Бу сезнең исемнән яки туганнарыгыз исеменнән була ала. Ризыкны әзерләү мәшәкатьләрен мәчет үз өстенә ала.

«Без бар кирәкле әйберләрне әзерлибез», — ди Хәлим хәзрәт. Гаризаны Җәмигъ мәчетенә килеп, шәхсән бирергә кирәк. Барлык өстәмә мәгълүматны 8-987-003 43-56 телефоны буенча (Альбина) ачыкларга мөмкин.

«Нурлы Рамазан» конкурсы: бәйрәм рухы тудырабыз

Традиция буенча Рамазан ае алдыннан «Нурлы Рамазан» конкурсы игълан ителә. Аның асылы — йортларны, кибетләрне, мәктәпләрне һәм башка биналарны изге ай хөрмәтенә бизәү. Бу барлык халык өчен гаҗәеп бәйрәм атмосферасын тудырырга ярдәм итә.

2026 елда конкурс 20 гыйнвардан 13 мартка кадәр дүрт этапта узачак. Җиңүче өчен төп бүләк — «ТР мөселманнары Диния нәзарәте Хаҗ» операторыннан хаҗга юллама. Финалга чыгучыларның барысы да мактаулы дипломнар һәм бүләкләр алачак. Узган ел районда шәхси йортлардан алып спорт мәктәпләренә һәм мәдрәсәләргә кадәр төрле оешмалар катнашты.