Алабуга Бөтендөнья тхэквондо федерациясенең тхэквондо буенча ике чемпионатын кабул итә

Кубокка дәгъва итүчеләр ярышлары 25 октябрьгә, командалар ярышлары 29 октябрьгә кадәр дәвам итәчәк. Ярышларда Россия Федерациясенең 34 субъектыннан барлыгы 350дән артык спортчы катнаша. Татарстаннан 24 кеше чыгыш ясый.

Ачылу тантанасы катнашучылар парады һәм Алабуга артистлары чыгышы белән башланып китте. Бу вакытта холлда барлык килүчеләрне Татарстан халыклары музыкасын башкаручы ансамбль каршы алды.

Аннары ярышларда катнашучыларны һәм аларның җанатарларын Татарстан Республикасы Яшьләр эшләре һәм Спорт министрлыгының спорт әзерлеге үзәгенең җәйге спорт төрләре бүлеге баш белгече, Казанның тхэквондо Федерациясе Президенты Эдгард Можаев әлеге зур вакыйга белән котлады. Ул спортчыларга лаеклы көндәшләр һәм ышанычлы җиңүләр теләде.

Алабуга районы башлыгы исеменнән җыелучыларны аның урынбасары Александр Косов сәламләде:

— Алабуга җирендә мондый дәрәҗәдәге ярышларны кабул итүебезгә без бик шат. Спортчыларга һәм тренерларга уңышлар телим. Алга!

Россия тхэквондо берлеге вице-президенты һәм башкарма директоры Геннадий Жигульский Татарстан һәм район җитәкчелегенә ярышлар өчен лаеклы мәйданчык өчен рәхмәт белдерде. «Иң көчле спортчы җиңсен», — диде ул, ярышларга рәсми старт биреп. Соңрак ул 62 килограмм авырлык категориясендә җиңүчеләргә бүләкләр тапшырды.

54 кг авырлыкта җиңүчеләргә аерым хөрмәт күрсәтелде — аларга бүләкләрне хәрби хәрәкәтләр ветераны, махсус хәрби операциядә катнашучы Андрей Че тапшырды, ул Алабуганы ТР Рәисе Кубогында күптән түгел генә тәкъдим иткән иде.

Көрәш җитди булды, көндәшләрнең берсе дә җиңүне бирергә теләмәде. Камил Гинатуллин Кама Аланыннан, әмма Чаллыда укый. Ул 58 кг авырлыкта 3 нче урынны алды һәм тантананың мактаулы кунакларының берсе — Россия тхэквондо берлеге вице-президенты, Татарстан Республикасы тхэквондо Федерациясе (ВТФ) Президенты Рәфис Мусин кулыннан бүләк алды.

— Мин бу ярышларга бик тырышып әзерләндем. Әмма ярышларга бер атна кала бик каты салкын тидердем, һәм бу нәтиҗәгә йогынты ясады. Һәрхәлдә, бронза бүләк — шулай ук бик лаеклы. Көндәшләр арасында мин белмәгән бик күп яңа спортчылар барлыкка килгән. Һәм бу яхшы — димәк, тхэквондо үсә.

Ульяна Крадинова Санкт-Петербургтан килгән. Ул 67 кг авырлыкта көч сынашты һәм Эдгард Можаев кулыннан алтын медаль алды.

— Бу ярышлар миңа бик ошады: лаеклы көндәшләр булды, алар белән эшләве дә рәхәт. Мин бик тә җиңәргә теләдем, һәм моңа ирешүемә шатмын. Безне кабул иткән өчен Татарстанга рәхмәт.

Ханты-Манси автономияле округы (Югра) призеры булган бер спортчының тренеры Тулеген Молдагулов мондый дәрәҗәдәге турнирда аның тәрбияләнүчеләре беренче тапкыр чыгыш ясады, дип сөйләде.

— Ярышлар бик яхшы оештырылган. Көндәшләр тәҗрибәле, минем егетләрдән өлкәнрәк. Шуңа күрә һәр дуэльдә без мөмкин кадәр көч сынаштык. Нәрсәдер килеп чыкты, нәрсәдер юк. Үзебездә ышаныч булдырырга һәм төбәктә тхэквондоны үстерү өстендә эшләргә кирәк.