Алабуга мөхтәсибәте Әтиләр көненә волейбол турниры уздырды

19 октябрь көнне Алабуга мөхтәсибәте һәм «Батыр-Фитнес» спорт комплексы Әтиләр көненә багышланган волейбол турнирын уздырдылар. Турнирда Милли белем бирү үзәге — 1нче гимназия, 2нче гимназия, «Адымнар — Алабуга», 10нчы күппрофильле лицей, Лекарево мәктәбе һәм Алабуга мөхтәсибәте командалары катнашты, дип хәбәр итә мөхтәсибәтнең матбугат хезмәте.

Бу турнирның үзенчәлеге — беренче тапкыр үткәрелүе генә түгел, ә катнашучыларның кемнәр булуында да. Бер үк командада әтиләр белән уллар янәшә уйнады. Менә бу — иң мөһиме, диләр оештыручылар.

— Мондый турнирның максаты спорт нәтиҗәләрендә генә түгел, ә кешеләрнең бердәмлегендә, якынлыгы артында. Әтиләр белән уллар бергә вакыт үткәргәндә, икесе дә спорт белән кызыксынганда, гаилә җепләре ныгый. Бу — иң зур кыйммәт. Мондый уеннарда тагын бер мөһим нәрсә туа — команда рухы. Бу да бик файдалы, — дип билгеләп үтте Алабуга районы имам-мөхтәсибе Халим хәзрәт Шәмсетдинов.

Нәтиҗәләр түбәндәгечә:

• 1 урын — 10нчы күппрофильле лицей;
• 2 урын — Лекарево мәктәбе;
• 3 урын — Алабуга мөхтәсибәте.

Җиңүчеләргә кубоклар, медальләр, мактау кәгазьләре һәм спорт комплексына сертификатлар тапшырылды.