Алабугалылар «Разведка кубогы»нда медальләр яулады

Алабуга армия кул сугышы буенча XXII Төбәкара «Разведка кубогы» турнирын һәм армия кул сугышы буенча Казан гарнизоны чемпионатын (Татарстан Республикасы чемпионатын) кабул итте.

Ярышлар Җиңел атлетика манежында уздырылды. Алар хәрби разведка көненә, Россия Кораллы Көчләре Генераль штабының ГРУ махсус билгеләнештәге гаскәрләре оешуга 75 ел тулуга һәм «Яшь десантчы» яшүсмерләр клубының 26 еллыгына багышланган иде. Ярышларда Татарстан һәм Киров өлкәсеннән 13 команда (125 кеше) катнашты. Алар Казан, Түбән Кама, Әлмәт, Лаеш, Нократ Аланы, Яр Чаллы һәм Алабуга шәһәрләреннән килде.

Ачылу тантанасында спортчыларны Алабуга районы башлыгы исеменнән АМР башкарма комитеты җитәкчесенең социаль үсеш буенча урынбасары Елена Мерзон сәламләде. Ул ассызыклаганча, турнирның зур тарихы ныклы традицияләр, остазларның югары квалификацияле булуы һәм яшьләрнең бу спорт төренә зур кызыксынуы турында сөйли.

Алабуга һәм район ветераннар (пенсионерлар) советы рәисе урынбасары Дамир Мәрданов җыелучыларны бәйрәм белән котлады һәм хәрби самбоның армиядә генә түгел, хокук саклау органнарында да хезмәт итүгә әзерлекнең мөһим өлешләреннән берсе булуын искәртте. Мондый кешеләр өчен «бурыч», «намус», «игелек» сүзләре аерым мәгънәгә ия.

«Разведка» балалар-яшүсмерләр хәрби-спорт әзерлеге үзәгенә нигез салучыларның берсе Рәшит Утешев турнирны хуплаулары өчен рәхмәт белдерде.

Беренче көнне беренчел көрәшләр узды, икенче көнне финал ярышлары булды. Спортчылар лаеклы көрәште, җиңүчеләр махсус хәрби операция ветераннары, шул исәптән баш судья һәм сугышчан хәрәкәтләр ветераннары советы рәисе Михаил Семенов кулыннан бүләкләр алды. Сүз уңаеннан, бүләкләр арасында Алабуга сугышчы-интернационалистларга һәйкәл рәвешендәге статуэткалар да бар иде. Тренерларга һәм иганәчеләргә рәхмәт хатлары тапшырылды.

«Разведка кубогы» команда зачетында «Разведка» үзәгендә тәрбияләнүчеләр өченче урын алды. Беренче урынны «Ватан» спорт-патриотик клубы (Казан), икенче урынны «Патриот» кул көрәше үзәге (Нократ Аланы) яулады.

Аерым үлчәү һәм яшь категорияләрендә Алабуганың 16-17 яшьлек спортчылары аеруча уңышлы чыгыш ясады. Беренче урынны Дмитрий Ярков һәм Максим Быстров яулады. Икенче урында — Руслан Ивлев һәм Илназ Гыйбадуллин. Мөхәммәт Шаһалиев төрле үлчәү категорияләрендә берьюлы беренче һәм икенче урыннарны яулады. Өченче урынны Константин Сидунов алды.

Максим Быстров мондый дәрәҗәдәге турнирда беренче тапкыр катнаша һәм үз авырлыгында алтын алырмын дип уйламаган да.

— Иң катлаулысы өченче көрәш булды — көндәш инде минем көрәш рәвешен өйрәнеп, максималь каршылык күрсәтте. Тик мин һичшиксез бу спорт төре белән шөгыльләнүне дәвам итәчәкмен. Нибары ике ел шөгыльләнәм, ә моңа кадәр физик яктан зәгыйфь һәм үз-үземә ышанычсыз идем. Бу ышанычсызлык тормышка бик комачаулый һәм хәтта булачак һөнәр сайлауны чикли иде. Хәзер минем яшьтәшләрем белән аралашу җайга салынды, эчке ышаныч барлыкка килде һәм хәтта лидерлык сыйфатлары да күренә башлады.

«12-13 яшь» яшь категориясендә үз авырлыгында икенче урынны Мәлик Фәйзуллин алды. «14-15 яшь» категориясендә өченче урынны Тимофей Пухов, Максим Касаткин, Вадим Марханов һәм Әмир Мамаджонов яулады.

Казан гарнизоны чемпионатының команда зачетында беренче урынны Казан югары танк команда училищесы спортчылары яулады, икенче урында — «Ватан» спорт-патриотик клубы. Өченче урын безнең «Разведка»га эләкте. Аерым авырлык һәм яшь категорияләрендә Алабуга егетләре түбәндәге урыннарны яулады: Дмитрий Ярков — икенче, Александр Сажин — өченче.

Турнир рефериларының берсе, «Разведка» инструкторы Павел Шлыков, Алабуга яшүсмерләрен инде 10 ел өйрәтә:
— Ярышлар лаеклы дәрәҗәдә узды. Таза егетләр килделәр, яхшы көрәшләр уздырдылар. Гомумән, безнең тәрбияләнүчеләрнең әзерлек дәрәҗәсе начар түгел, әмма башкалар белән чагыштырганда, тәҗрибә, тырышлык җитмәде. Алга таба тагын да тырышып эшләргә кирәк.

Ике көнлек ярышларны тәмамлап, Татарстан Республикасы армия кул сугышы Федерациясенең беренче президенты, Казан танк училищесын тәмамлаучы һәм укытучы Артур Даудов ассызыклады:

— Минем тәрбияләнүчеләр арасында Россиянең чын геройлары бар, алар икеләнмичә үзләренең хәрби һәм гражданлык бурычларын үтәделәр һәм үтиләр. Мин сезнең бу традицияне дәвам итүегезне телим, нәкъ менә сез — безнең киләчәгебез. Ватаныбызны бездән башка беркем дә сакламаячак. Барыгызга да уңышлар, сәламәтлек, тыныч күк йөзе һәм җиңү телим.