«Россия чаңгы юллары-2025» узышларында 2 меңнән артык алабугалы катнашты

Бүген профессиональ спортчылар һәм чаңгы ярышларын яратучылар ипподромга җыелды. Биредә узган массакүләм йөгерүдә теләге булган һәркем катнаша алды. «Россия чаңгы юллары-2025» спорт чарасы башланганчы барлык катнашучыларны АМР башкарма комитеты җитәкчесенең социаль үсеш буенча урынбасары Елена Мерзон, АМР ветераннар советы рәисе Геннадий Баганов һәм шәһәр предприятиеләре җитәкчеләре сәламләде. 

— Бу патриотик йөгерү. Быел ул «Җиңүнең 80 еллыгы» билгесе астында уза. Шуңа күрә стартка беренче булып элеккечә мәктәпкәчә яшьтәгеләр түгел, ә безнең ветераннар чыгачак. Бу хөрмәт күрсәтү», — дип билгеләп үтте Елена Мерзон үзенең сәламләвендә. 

‒ «Россия чаңгы юллары» традиция буенча үткәрелә. Бу искиткеч спорт чарасы, ул барыбызны да: балаларны да, яшьләрне дә, ветераннарны да берләштерә, — диде Геннадий Баганов.

Спортчылар арасында Алабуганың чаңгы спорты ветераны, легендар чаңгычы Валентина Белавина да бар иде. Сүз уңаеннан, ул бу йөгерүдә беренче старттан бирле катнаша. Ягъни инде 43 ел. Ә аның үзенә 72 яшь. 

— Спортны, чаңгыны яратам, барыгызга да формада булуны, сәламәтлек һәм яхшы кәеф телим! — дип ярышучыларга хәер-фатихасын бирде Валентина Белавина. 

Иң яшь спортчылар - өч яшьлек Милана һәм Василиса үзләренең 40 нчы «Йолдызлык» балалар бакчасы данын яклап чыгыш ясады. Балалар бакчалары тәрбияләнүчеләре арасында 8 яшьлек Эльвир Гайнатуллин җиңү яулады. Ул «Россия чаңгы юллары»нда инде өченче ел рәттән катнаша. 

— Минем кәефем бик шәп! Мин җиңдем! — диде Эльвир үз хисләре белән уртаклашып. 

«Россия чаңгы юлы-2025»тә мәктәпкәчә яшьтәге балалар, мәктәп укучылары һәм ветераннар арасында узышлардан тыш, студентлар һәм шәһәр учреждениеләре, оешмалары һәм предприятиеләре хезмәткәрләре өчен аерым узышлар оештырылды. Спорт чарасында катнашучыларның барысы да билгеләп үтелде, ә җиңүчеләргә грамоталар һәм символик бүләкләр тапшырылды. Бөтенроссия чаңгы узышында барлыгы 2000нән артык алабугалы катнашты. Ярышларның баш хөкемдары — Юрий Затеев.

Республиканың «Россия чаңгы юллары-2025» ярышлары «Хезмәткә һәм оборонага әзер» (ГТО) ВФСК исәбенә керде.