«Йолдызлык» мәдәни үсеш үзәгендә Халыклар бердәмлеге көнен билгеләп үттеләр

Дистәләгән мәдәният вәкилләре дус һәм тату яши торган күпмилләтле Алабуга өчен бу бәйрәм аеруча әһәмиятле.

«Йолдызлык» мәдәни үсеш үзәгендә төрле милләт һәм яшьтәге алабугалыларны җыйган тантаналы чара районда милләтара мөнәсәбәтләрнең ныклы булуын раслады. Фойеда ук кунакларны «Ак каз» керәшен ансамбле, «Сөембикә» татар ансамбле, «Забавушка» рус җыры ансамбле һәм «Инвожо» удмурт ансамбле каршы алды.

«Бүген үзенчәлекле бәйрәм көне, — дип уртаклашты «Сөембикә» ансамбле солисты Айгөл Һадиуллина. — Безнең янәшәдә башка милләт коллективлары — мари, чуваш, руслар, без мондый чараларда очрашабыз, күңелле яшибез».

Бу сүзләр бәйрәмнең гомуми атмосферасын чагылдыра. Сәхнәдән төрле телләрдә җырлар яңгырады, ә залда чын гаилә атмосферасы хөкем сөрде.

«Бүген безнең барыбыз өчен дә зур бәйрәм, бу барыбызны да берләштерә торган көн. Ел саен биредә гаилә белән катнашабыз, җырлыйбыз, балалар бии, — диде әрмән җәмгыяте вәкиле Алла Лалаян. — Без башка милләт кешеләре белән аралашабыз, бер-беребезгә ярдәм итәбез. Хәзер без шундый катлаулы вакытта яшибез, безгә бердәмлек аеруча мөһим».

Алабуга шәһәр Советы депутаты Аделя Абдуллина: «Халыклар бердәмлеге көне — ул, барыннан да элек, якты киләчәккә ышаныч берләштергән кешеләрнең бердәмлеге. Без диннәрнең һәм милләтләрнең бердәмлеген түгел, ә кешеләрнең күңелләре бердәмлеген билгеләп үтәргә киләбез».
Район халкын бәйрәм белән Алабуга районы башлыгы исеменнән һәм шәхсән үз исеменнән башлыкның урынбасары Александр Косов котлады.

«Ватанга мәхәббәт, татулык, бердәмлек һәм үзара ярдәмләшү — җәмгыятебезнең нигезен тәшкил итә торган кыйммәтләр, — дип ассызыклады Александр Косов. — Бүген, күп гасырлар элек кебек үк, без халык бердәмлегенең реаль көч булуын күрәбез. Ватаныбыз мәнфәгатьләрен намус белән яклаучы батыр сугышчыларыбыз моңа ачык мисал булып тора».

Ярдәм темасын дәвам итеп, район башлыгы урынбасары бүләкләр тапшырды. Мактау грамотасы белән хәрбиләргә ярдәм итүгә керткән зур өлеше өчен «Вместе к Победе» волонтерлык хәрәкәте машина йөртүчесе Рәфыйк Бариев бүләкләнде. Ул безнең сугышчыларга 50 тапкырдан артык гуманитар йөк китергән, Запорожьедан алып Донецк Республикасына кадәр бөтен фронтны әйләнеп чыккан.

Милли мәдәниятләрне үстерүгә һәм саклауга керткән өлешләре өчен Шерали Әмиров, Зивар Оруджова, Алик Лалаян һәм Наталья Сорокина рәхмәт хатлары алдылар. Хәрбиләргә ярдәм итүгә зур өлеш керткәне өчен Роман Епанешников бүләкләнде.

Җыелганнарны Алабуга муниципаль районы ветераннар советы рәисе Геннадий Баганов та котлады, барысына да тыныч күк йөзе һәм иминлек теләде.

«Йолдызлык» тагы бәйрәм Алабуганың туган илгә мәхәббәт белән берләшкән дистәләгән халыкларның дуслыкта һәм татулыкта яшәвенең чын үрнәге булуын күрсәтте.