Июль ахырына кадәр Татарстанда яңа температура рекордлары көтелми

Татарстанда июль ахырына кадәр яңа температура рекордлары булмаячак. Бу хакта «Метео» прогноз үзәге җитәкчесе Александр Шувалов белдерде. Казан мэриясенең матбугат хезмәте шул турыда хәбәр итә, дип яза «Татар-информ».

«Уйламагыз да, бернәрсә дә булмаячак. Июль ахырына кадәр бернинди рекордлар да узылмас», — дип белдерде метеоролог. Ул республика территориясендә июльнең максималь температурасы аномаль эссе булган 2010 елда ук теркәлгәнен искәртте.

«Эссе һава торышы көтелә, Татарстанның көньяк-көнчыгышында да иң күбе — +32, +33 градус. Ә Казанда якынча +30, +31 градус тирәсе. Һава торышы эссе, әмма рекордлы түгел», — дип ачыклык кертте Шувалов.