Алабугада дәүләт автоинспекторлары исерек яшүсмерне тоткарлаган

Исерек хәлдәге 15 яшьлек малайны Спас урамында ачыклаганнар. Ул ОКА автомобиле белән идарә иткән. Яшүсмер әйтүенчә, машинаны ул әнисеннән алган. Хәзерге вакытта транспорт чарасы махсус стоянкага урнаштырылган. Вакыйга кичә иртәнге 4.15 сәгатьтә була

«Машина йөртүче административ җаваплылыкка тартылу яшенә җитмәгәнлектән, РФ КоАП 12.8 статьясында каралган административ хокук бозу билгеләре буенча материал туктатылды. Мәгълүмат ата-аналарны административ җаваплылыкка тарту мәсьәләсен хәл итү өчен балигъ булмаганнар эшләре буенча комиссиягә тапшырылды», — дип аңлаттылар Алабуга ЮХИДИ бүлегендә.