Рөстәм Миңнеханов Медведевка Алабуга турында сөйләде

Республиканың башка уңышлары исәбендә ул "Алабуга" МИЗын да билгеләп үтте. "Анда инде 29 резидент бар һәм бу тенденция саклана. 4 апрельдә Эльвира Нәбиуллина һәм Даниянең икътисад министры катнашында җылылык изоляциясе материалларын җитештерүче иң эре завод ачылды", дип сөйләде Р.Миңнеханов. "Сез тәкъдим иткән Кама инновацион территориаль-җитештерү кластеры турында тагын бер фикер бар. Эш алып барыла, үз материалларыбызны әзерләдек. Сез конкурс үткәрергә дигән йөкләмә биргән идегез - без әлеге бәйгегә әзер. Бу безнең Кама буе зонасы: Чаллы, Түбән Кама, Алабуга. Әлегә монда сәнәгый табыш 600 миллиард сум тәшкил итә, 2016 елга - триллион сум, ә 2020 елга ике триллион сумга җиткерү планлаштырыла. Зонада ТАНЕКО, ТАИФ-НК, "Нижнекамскнефтехим", Ford Sollers ,"Аммоний" эшли. Бу - Рәсәй икътисады өчен үсеш ноктасы булырга мөмкин. Монда безнең партнерларыбыз, Роснано һәм Ростехнологияләр, барлык Рәсәй фондлары", диде республика башлыгы.