Татарстанда шторм кисәтүе игълан ителде

10-15 гыйнварда аномаль салкын һава торышы көтелү сәбәпле, Татарстанда шторм кисәтүе игълан ителде. Гидрометеорология үзәге фаразлары буенча, бу вакытта республика территориясендә аномаль салкын һава торышы, уртача тәүлеклек һава температурасы −18..-24 градус саклана, бу нормадан 9-15 градуска түбәнрәк, дип яза «Татар-информ».

10-15 гыйнварда минималь һава температурасы −23..-28 градус, 11 гыйнварда −33 градус, көндез максималь температура −16..-21 градус тәшкил итәчәк.

Салкынайту сәбәпле, Россия Гадәттән тыш хәлләр министрлыгының Татарстан буенча баш идарәсе матбугат хезмәтендә татарстанлыларга саклык чараларын үтәргә киңәш иттеләр. Республикада яшәүчеләргә шәхси автотранспортта торак пункттан читкә — табигатькә, урманга, балыкка һ.б. баруны кичектереп тору хәерле.

Балаларны өлкәннәрдән башка урамда калдырмаска, фатирларны һәм подъездларны җылыту турында кайгыртырга һәм янгын чыгуны булдырмас өчен мичне кыздырмаска һәм кулдан ясалган җылыту приборларын кулланмаска кирәк. Шулай ук бинаны җылыту өчен газ плитәләрен кулланмау хәерле.

Шуны да истә тотарга кирәк: өшемәс өчен урамда юешләнмәскә һәм туңмаска, яхшы тукланырга һәм җылы киенергә кирәк. Күп катлы һәм хәрәкәтләнергә уңайлы кием-салым сайларга тәкъдим ителә.