Рәсәйнең иң яхшы шоферы

Илебездәге иң оста шоферларның дәү машиналары Екатеринбургта финал ярышларында очрашты. Хәлиткеч чабышларда 16 автотранспорт предприятиесе катнашты. Алабуга данын "Эссен Продакшн АГ" хезмәткәрләре Александр Кобелев һәм Александр Биляк яклады. Аларга шәхси һәм командада эшләү осталыгын күрсәтергә кирәк иде. Зур йөк машиналарына "Бокс", "Елан", "Түгәрәк", "Парковка", "Колея", "Тоннель капкасы", "Стоп" кебек күнегүләрне үтәргә кирәк булды. Әйтүләренә караганда, быел трасса аеруча мавыктыргыч булып, җиңү өчен көрәш тә киеренке барды.

Алабугалы Александр Кобелев бик тә яхшы нәтиҗә күрсәтте: "Парковка"ны минималь кимчелекләр белән 2 минут 47 секундта башкарып чыгып, көндәшен 29 секундка артта калдырды. Машинаны шулкадәр тиз, җитез, ә иң мөһиме төгәл йөртүе белән ярыш тамашачыларын әсир итте. Александр ярышларда иң тәҗрибәле машина йөртүчеләрнең берсе иде, аның шоферлык стажы - 30 ел. "Эссен Продакшн АГ" да алты ел йөк ташучы Александр Кобелевны хөрмәт итәләр. Аның ике улы да ерак юлга йөрүчеләр.

Команда зачетында Александр Кобелев һәм Александр Биляк икенче урын алдылар.

Ярышта җиңүчеләргә Шевроле Авео машинасы һәм скутер, кубок, медальләр һәм конкурсны оештыручылардан, спонсорлардан кыйммәтле бүләкләр тапшырылган.

Юлия Трошина