Токмашка авылы буасы төзекләндереләчәк

Алабуга хакимиятенең кече залында ТР Экология һәм табигать ресурслары министрлыгының күчмә киңәшмәсе булды. Киңәшмәдә районның Токмаш авылы буасын төзекләндерү мәсьәләсе буенча фикер алыштылар. Киңәшмәне экология һәм табигать ресурслары министры урынбасары Равил Кузюров алып барды. Төзекләндерү эшләре турында эшмәкәр Фәрит Шиһапов сөйләде. Аның сүзләренчә, Токмаш авылы моннан 150 ел элек барлыкка килгән. Авыл халкы тарафыннан булдырылган буага бүгенге көндә ләм җыелган. Эшмәкәр әйтүенчә, авыл инфраструктурасын алга җибәрү өчен буаны да төзекләндерергә кирәк. Бүгенге көндә авылда 37 кеше яши.